كنوز محبة

كنوز محبه من الاغاني المحفوره في وجداننا..فنحن جيل زيدان ابراهيم وكان عندما يغني نتراقص طربا. رحمه الله

انشودة الجن

والله يامعتز الرازي زولك دا امنت بيو عديل كده

الردة

والله ياجماعه انا شايف موضوع الرده دا بقي زي المبارة بين القران والسنة. ناس السنة بقولو كلام وناس القران بقولو كلام مخالف ليو. الاعتماد علي الحديث البقول من بدل دينه فاقتلوه بدخلنا في مشاكل لا حصر لها لانو اولا مافي دليل قاطع انو الرسول قال كده خصوصا الكلام دا بتعارض مع كم ايه قرانيه بتقول المرتد ماعندكم علاقه بيو. وثانيا حكايه تكتل زول دا ما شي ساهل لانو الروح دي مابترجع تاني.

انا شخصيا مع القران. وبفتكر الحديث دا ماصحيح وانا بالمناسبه اي حديث بيتعارض مع القران ماباخد بيه. في ناس بقولو ليك مافي جديث بيتعارض مع القران. بالعكس في احاديث كتيره بتتعارض معاهو. منطقيا كده ياجماعه المرتد دا مشكلة البشر شنو مع ارتدادو؟ المشكله مع ربو مش كده والله سبحانه وتعالي قال بصورة واضحه الزول دا خلو لي لمن يصلني بعرف اعمل ليو شنو.

تعرفو اسوا حاجه في اغتيال المرتد انو عندنا في الاسلام في افعال كتيره بقوا يعاملوها زي الارتداد عشان يكتلوك. مثلا لو سبيت الرسول (والعياذ بالله) بيعتبروك مرتد ويقيموا عليك الحد. عشان كده نحنا في السودان ماشين (سافل) والاسلام ماشي (صعيد). بس عزيزي القارئ خليك حريص وفتح عينك كويس عشان ماتطش وتبقي من اهل النار. يوم القيامه لا بجي معاك الامام مالك ولا ابوهريره..براك تاكل نارك 

عشان كده انا في يوم كتبته الموضوع التالي:

اعتذار لأمرأتين

د الرازي الطيب ابوقنايه

مافي بلد في الدنيا اساء للاسلام زي السودان. انعدام للعدل, انتشار للفساد والقتل علي قفا من يشيل. بس الاساءه دي تمثلت اكتر في تحدينا لي كلام الله واستبدالو بي كلام متناقض معاهو تماما. تعليمات مكتوبه في شكل ايات قرانيه واضحه, شنو البخلي الحاكمين يفهموها غلط او يعملو عكسها. في امراتين ضحيه للفهم الغلط دا وواجب علينا نعتذر ليهم. الاولي الطبيبه الاتحاكمت الايام الفاتت بي تهمه الرده, والتانيه اسماء محمود محمد طه بي عدم تسجيل حزبها بواسطه مسجل الاحزاب ولاسباب واهيه اهمها انو الحزب بدعو للفتنه الدينيه. اتخيلو نحنا تحصل لينا فتنه دينيه. نحنا في السودان اصلا ماتاذينا من ناس ارتدو ولا تابعنا زول قبل كده كلامو بناقض الدين البنعرفو. بس ائمتنا عشان عندهم عداوه مع الجمهورين بالذات بستغلو الشعارات الدينيه دائما كسلاح للقضاء عليهم علي حساب الدين.

في ايات صريحه وكتيره بتتكلم عن حق الانسان في الايمان بالله او الكفر به. وربنا الوحيد العندو الحق  في التعامل مع الحاله دي وطلب من البشر عدم التدخل فيها لانها مامن اختصاصاتم.  هسع انا اومن ولا اكفر انته دخلك شنو؟ بتستفيد شنو من تدخلك دا؟ لو انته اصلا متدين وبتخاف الله طبق الدين علي نفسك عشان تزيد حسناتك وتقلل سيئاتك والبشريه تستفيد منك. لكن تجي تتدخل في  فلان مسلم ولا كافر مرتد ولا يهودي فللاسف حسب فهمنا للدين بتكون الهته نفسك ساي. بعدين حتي لو اديت نفسك الحق في الحكم, كيف حتعاقبو وربنا في القران ماورانا كيفة العقاب دا. ياجماعه سيبو الخلق لي خالقها فيما يخص الدين واتفرغوا لي نفسكم.

عشان كده, الطبيبه الاتحاكمت بي تهمه الرده قطع شك طالبانا اعتذار للمحاكمه الاتعملت ليها. ياخ دي طبيبه يعني بتفهم خبابا ودهاليز الجسم البشري, ماتقدر تعرف انو قناعاتا الدينيه ممكن توصلا لي وين؟ معقول مره زي دي مابتكون عارفه الله في ولا مافي وانو قراراتا الدينيه محسوبه عليها وكونها تختار الاسلام او المسيحيه معناتو شنو؟ انا بفتكر مافي زول عندو الحق يتكلم معاها اطلاقا لانها مسئوله من تصرفاتا بنص القران والايات واضحه كالشمس.  عشان كده بنعتذر ليها عن اي مشكله حصلت قبل واثناء وبعد محاكمتا وبنتمني لو كان عندنا القدره ندافع عن حقها في الاختيار وربنا بعد داك كفيل بيها.

المره التانيه الاستاذه الجليله ابنه الشيخ الجليل المسلم محمود محمد طه. من حقها تعمل حزب زيها وزي اي زول تاني لانو من حقها تتكلم وتورينا راسا دا فيو شنو. اذا هيئه علماء المسلمين بتفتكر انها ممكن تسمم افكارنا فهي غلطانه. نحن بنعرف نفرق كويس جدا بين الحق والباطل بس ادونا فرصه نسمعا عشان لو اصلا بقت علي باطل حاتتلاشي فكرتا وتموت دون الحجر عليها. اما اذا كانت علي حق ودي طبعا نحنا بنقررا بعد دراسه مرجعياتنا, فالحق احق بان يتبع بالحسني. ولذلك نحن نري ان مسجل الاحزاب اخطا خطا جسيم في عدم تسجيل حزبها وبالتالي السيده اسماء طالبانا اعتذار علي كده. متين ياجماعه الحاكمين علي امرنا يحكمو بالعدل ويتجردو من القناع السياسي اللابسنو دا ويبطلو حسم معاركهم مع خصومهم بسلاح الدين. لو ماعارفين دا فيو اساءه للدين.

حكايه دا مرتد ودا كافر ودا مخالف راي المجموعه انسوها لينا. لو اصلا في حاجات ربنا ذكرها في القران بطريقه واضحهورونا ليها عشان نتنور. ولو في زول عندو شرح لدين غير العارفنو يقولو لينا عشان نفهم. والكلام لازم في الهواء الطلق حتي لو كان من كوز ولا انصار سنه ولا سلفي او جمهوري اوغيرم وخلونا نحكم ونتابع لانو اصلا في النهايه يوم القيامه ربنا بحاكمنا علي قناعاتنا الاتبعناها ومهما كان تسلط الناس علينا في اجبارنا بالقوه برضو القناعه النهائيه لينا نحنا.

ادونا حريتنا نختار (وقل الحق من ربكم فمن شاء فليؤمن ومن شاء فليكفر)1. وبعد داك (انا اعتدنا للظالمين نار احاط بهم سراديقها وان يستغيثو يغاثو بماء كالمهل يشوي الوجوه)2 ودا عقاب الزول البكفر للتذكير يعني.

كنت بتمني في النهايه اجيب زياده ايات قرانيه ادعم بيها كلامي, بس زي ماقلته في الاول انو نحنا في السودان اكتر ناس اساءو للاسلام ونسو كلام الله, ولو جبنا القران كلو برضو في ناس ماحاتقتنع لانه سبحانه وتعالي جعل علي (قلوبهم اكنه ان يفقهوه)3 كما (ختم الله علي قلوبهم وعلي سمعهم وعلي ابصارهم غشاوه)4 وبقو مابفرقو بين الحق والباطل. يارب نجنا من القوم الظالمين.

1 الكهف الايه 29,

2 الكهف الايه 29

3 الاسراء الايه 46

4 البقره الايه 7

You can follow me in twitter@elrazi_elrazi

واحد كوز مستهبل

عندما تحدث معي احد اعضاء الاسلام السياسي في السودان عن سبب بلاوي المسلمين والتي ارجعها الي العلمانيه والغرب ممثلا في مريكا قلت له بكل وضوح: انته بذلك تكون قد قمت باستفزاز تفكيري. ثم سالته بكل صراحه هل سرقه اعمدة النور في حلتنا في بحري كان سببه العلمانيه؟ هل استيلاء اللجنه الشعبيه علي كل القطع السكنيه الفاخره التي قسمت علي الفقراء كان وراءه اوباما ام هل اغتصاب الاطفال في خلاوي القران وزني الفتيات في الفنادق في نهار رمضان من صنيعة الاتحاد الاوروبي؟

العلمانيه هي حكم القانون وانتم لا تتعايشون مع القانون لانكم قمتم باعادة صياغه للدين لتستخرجوا قانونا يخدم مصالحكم ولذلك نحن سنقف ضدكم ونحاربكم الي ان نموت علي ذلك.

مليون دولار بتاع فنلتك

السوداني الكسب مليون دولار في الام بي سي عمل ضجة كبيرة لبرودة اعصابو عندما اتصل به الاعلامي الاغا واطلعه علي الخبر.

جنجويد لحمايتنا. يالسخرية الاقدار

من الذي يحدد الخطوط الحمراء في هذا البلد المنكوب؟ هل هم فتوات الجبهه الاسلاميه القوميه الذين انقلبو علي الشرعيه الدستوريه في 89 في ظاهره تعتبر عالميا من اكبر ظواهر انتهاك القانون واصبحو بذلك اغني من تجار الماس اليهود في العالم؟ ام التابعين لهم من صعاليك اللهط وسارقي قوت الشعب وعصابات الاراضي والكومشنات والذين يعيشون بيننا حياة الترف والمجون التي ليس لها مثيلا سوي حياة العاهرات وانصاف الرجال؟ ام الهمباته وقاطعي الطرق الذين ظلو يروعون اهلنا في دارفور منذ العام 2003 وحتي كتابة هذه السطور فقتلو واغتصبو نساءنا  بلاانسانيه لا يماثلهم فيها سوي صعاليك امريكا الجنوبيه من تجار البشر والمخدرات رغم انهم يشهدون ان لا اله الا الله وان محمدا رسول الله. نحن نري ان الذي يحدد الخطوط الحمراء هو الدستور فقط رغم انف كل الذين يمسكون بالسلاح من قوات نظاميه ومرتزقه واسلامويون.  السلاح الذي اشتريناه بما جادت به ارضنا الطيبه المعطاءه لحمايتنا, فقامو بتوجيهه الي صدورنا لاذلالنا وجعلنا عبيدا نخدم ملذاتهم الدنيويه. للاسف كثير من افراد الطغمه الحاكمه حكمونا بما لم ينزل الله فصارو فاسقين, كاذبين وظالمين كما جاء وصفهم بالقران الكريم, ثم قامو بانشاء دينا غير دين محمد فيه قتل المرتد والعفو عن المغتصب وتحلل السارق. وبايماننا ان الدستور هو الوحيد الذي يحدد الخطوط الحمراء, فبامره يكون الامام الصادق المهدي رئيس الوزراء الشرعي لهذا البلد هو الخط الاحمر الذي لايمكن تجاوزه, ومن يسلبه حريته يصير عدونا اللدود.

الصادق المهدي الرجل التقي, المؤدب والراضع من صدر الديموقراطيه منذ نعومه اظافره حاشاه ان يتبلي علي القانون او ينتهكه. نعم قد فعل ذلك مره واحده لا زلنا نعض انامل الندم عليها. وقد كانت حينما وقف ضد عرف كل اهل السودان في اوخر ايام الديموقراطيه التي كان فيها رئيسا للوزراء (والعرف هو قانون ايضا) وقام باشراك عصابة الجبهه الاسلاميه القوميه في الحكومه انذاك لتصبح بعدها طابورا خامسا قاد البلاد الي التهلكه والقت بنا في جحيم الانقلاب المشئوم الذي نعيش عذاباته حتي الان.  

للاسف من يتبول علي القانون يوميا هم الذين ينادون بتطبيقه. وقمة ازدرائهم له, محاولتهم الايحاء لنا بان الجنود المرتزقه الذين تجمعو من بوادي ولايات دارفور الكبري والمعروفين للعالم باسم الجنجويد والذين يحيطون بالعاصمه الان, انما هم قوه تدعم الجيش سريعا لحمايتنا. حمايتنا من من؟ وهل يؤتمن الذئب علي الغنم الغاصيه؟ هل سمع اي منكم من قبل باداره داخل الجيش تسمي ادارة الدعم السريع لحمايه المدنيين؟ وماهي مهمة الجيش اذن؟ وحدات جيشنا التي نعرفها تتمثل في سلاح الاسلحه والاشاره والمظلات وغيرهما. ولكننا لم نسمع قط من قبل بما يسمي قوات الدعم السريع. اخوان الشياطين وحفاظا علي ماسرقوه لن يتوانو في خلق اجسام غريبه داخل قواتنا النظاميه. فامام اعيننا الان تجربة  النظام العام التابع للشرطه والذي صار يحدد لنا كيف ومتي نفرح واين ننام.  والدفاع الشعبي التابع للجيش شاركنا حتي في تربية ابنائنا.  اخاف اذا استمر الحال هكذا ان يقومو بكتابة قران مواز للقران الكريم بعد ماسمعنا انهم رفعو التمام للرسول (ص). هؤلاء الحثاله يوهمون اهلنا الطيبين بان الرسول قد اعطاهم شيكا علي بياض وهو منهم براء.

بحكم القانون الذي نؤمن به, وبمرافعة هيئة الدفاع عن الامام (سودانايل, 22 مايو 2014) تعتبر القضيه ضده كسيحه ولا سند لها. تقول المرافعه والتي دفعت بها الهيئه للمحكمه ان "قرار النيابه بعدم إطلاق سراح الإمام استنادا على المادة (2/106) من قبيل الخطأ الجسيم لان المحكمه نفسها لا تستطيع في حالة ادانته توقيع أو تنفيذ عقوبة الإعدام أو السجن عليه كونه قـد تجـاوز السـبعين من العمر لان المادتان (1/36) ـ (2/36) من الدستور، والمادة (2/37) من القانون الجنائي تحظر معاقبة من بلغ السبعين بالإعدام في غير القصاص أو الحدود، كما تحظـر المـادة (4/33) من القانون الجنائي معاقبة من بلغ السبعين بالسجن في غير حد الحرابة؛ وعليه رات هيئه الدفاع انه من الخطأ أن تطبق النيابة في مرحلة التحري نص المادة (2/106) المشار إليها."

ويبقي السؤال. ماذا يريد الكيزان بهذه المحاكمه ونص القانون واضح فيما يتعلق بعقوبه من بلغ السبعين غير العقوبه الحديه.  وحاشا علي الامام ان يرتكب جريمه حديه.  فكل الذي فعله انه قال مالم نستطع ان نقوله نحن والموجود في صلب القانون نفسه. فالقوات المسماه بالدعم السريع ماهي الا قوات جنجويديه معروفه للعالم اجمع كاخطر عصابات النهب المسلح واغتصاب النساء وسرقه الشعب الامن في دارفور وكردفان . والقانون نفسه يطالب بالقبض عليهم ومحاسبتهم خصوصا زعيمهم المدعو حمدتي. لقد راينا بام اعيننا الشريط الفضيحه الذي سجلته معه القناه الانجليزيه الرابعه في العام 2008  والذي اكد فيه بانهم حفنه من المرتزقه تدافع عن من يدفع اكثر. واستنادا عليه, نطالب حماة القانون القبض عليه وتقديمه للمحاكمه بتهمة ترويع المواطنين العزل وقتلهم. ونطالب ايضا بتطبيق شرع الله فيهم حسب منطوق الايه: "إنما جزاء الذين يحاربون الله ورسوله ويسعون في الأرض فسادا أن يقتلوا أو يصلبوا أو تقطع أيديهم وأرجلهم من خلاف أو ينفوا من الأرض ذلك لهم خزي في الدنيا ولهم في الآخرة عذاب عظيم ". 

اما بخصوص حزب الامه ياكيزان, فقد قال الامين العام "سنلقنكم درسا لن ينسوه".  وإن القول ماقال الامين العام.

Follow me in twitter@elrazi_elrazi

شهداء سبتمبر 2013

           

لن ننسي وجه محمود كما اننا لن ننسي وجه القاضي

الذين اسودت وجوههم

الاية 106 من سورة ال عمران "يوم تبيض وجوه وتسود وجوه فأما الذين اسودت وجوههم اكفرتم بعد ايمانكم فذوقو العذاب بما كنتم تكفرون"  صدق الله العظيم

مايكل جاكسون وبرنسس ديانا

واحشني

الوسطية في الإسلام

هذا التعليق كتبته في موقع سودانيز اون لاين بتاريخ 12 سبتمبر 2014 ردا علي بوست يستفسر عن معني الوسطية في الاسلام:

تتمثل المشكله في الفهم الخاطئ لكلمة وسطا. وسطا تعني حسنا وبذلك يستقيم معناها في مواضعها المختلفه في القران وهي عده. 

فمثلا الايه 28 من سورة القلم تقول "قال اوسطهم الم اقل لكم لولا تسبحون" فمعني احسنهم هنا هو الصحيح والا ستكون الكلمه بلا 

فائده فماهو مدلول ان يقول اوسطهم سنا مثلا؟. وفي الايه 143 من سورة البقره "وكذلك جعلناكم امة وسطا لتكونو شهداء علي 

الناس" لابد ان يكون معني هذه الكلمه حسنا هنا والا ستتعارض مع الايه 110 من سورة ال عمران "كنتم خير امة اخرجت للناس" 

وبالاصرار علي تجاهل المعني (حسنا) لكلمة وسطا سيستمر السؤال عن ماهي الصلاة الوسطي بلا اجابه لانه لايمكن لكائن من 

كان ان يقنعنا بان صلاة العصر او المغرب او الفجر هي الصلاة الوسطي حيث لا مرجعية لذلك. فالصلاة الوسطي هي الصلاة 

الحسني اي الصلاه المملوءه بالخشوع لله سبحانه وتعالي. والله اعلم.

نفسي ابقي وزير ياخ !!

د الرازي الطيب ابوقناية

الحكاية ابسط مما تتخيلو. كدي في الاول نشوف السودان فيو كم وزير؟  مممم  17 ولايه وكل ولايه فيها ممممم كم هايل من الوزير, زايد تيم من المستشارين  بي درجه وزير ياطويل العمر ااااااا نضيف ليهم بعيد عنك مممم الوزراء (البدون) يبقي التوتال تقريبا زي ممم سبعه الف وزير.  دا طبعا رقم تقريبي. معقول ياجماعه لا انا لا زول من دايره اصحابي ومعارفي القريبين ما نكون من الجماعه ديل؟ اي في كم قنايابي كده بقو وزراء بس ياحسره كان في اختلاف بيناتنا ايدولوجيا عشان كده مافكرو فينا وانا ماختيتهم في بالي عشان كده قلنا احسن نجيبا بي ضراعنا عديل كده.

طيب نشوف الناس البختارو الوزراء بختاروهم كيف عشان امكن الحكايه تضرب المره دي؟  انتو بالمناسبه السعيده دي, منو البختار الوزراء؟ ناس المؤتمر الوطني؟ اوكي طيب بختاروهم كيف؟ بصلو الصبح مع بعض مثلا, ولا شلليه, ولا الواحد بقوم الصباح بلقي نفسو (برعي)؟ طبعا حكايه الزول يصلي الصبح حاضر دي اسهل حاجه لاننا متعودين عليها من ايام ابوي الشيخ. بس ترتيبات الصلاه في حاله الوزاره كيف ماعارفنها. يعني الواحد يجي متزحزح من الصف الورا لمن يصل المسئول الببقي الناس وزرا في الصف القدام ويقعد بي يمينو ولا شمالو عشان لمن يسلم يقوم يحضنو ويبكي ولا كيف؟ الزحزحه ساهله بس البكاء دا صعب ومامعانا ياخ. مرات كده مره صاحبت امك تحضنك لمن تجي من السفر وتقعد تبكي وانته مخك مدورمع الفيس بوك والوتس اب ماتعرف تعمل شنو. انسونا من البكا دا بليس. موضوع الشلليه برضو صعب لانو خلاص الكوته بتاعه الاصحاب شطبت ومافي طريقه الا لي عابري السبيل. وزي ماقال واحد صاحبنا, صعب الزول بعد دا يعمل اصحاب الا اسفيريا. وشلتنا الهسع دي كلهم بتاعين تنظير ساي. اما حكايه تقوم من الصباح وتلقي نفسك بقيت (برعي) دي سابع المستحيلات. ياخ ديل الواحد فيهم قابض في الكرسي زي الكأنو خلقو ليو. فيهم واحدين ليهم طاشر سنه, وواحدين نقل بس من كرسي لي كرسي زي كمساري الحافله.  ولا الجوعارين ديلك. مره ياعمك في واحد شالو من الوزاره عزف منفردا زي بتهوفن, تقول لي تقوم الصباح تلقي نفسك برعي؟

اها الدباره كيفنها ياجماعه؟ لازم ابقي وزير خصوصا لانو الحكايه خمرت في الراس والعمر كمان سرح والركب ساحت. وماابقي ليه ياخ وبتكلم تلاته لغات؟ هسع البنشوفهم كل يوم في التلفزيون ديل احسن مننا في شنو. ظني لغه واحده في تلتله. سوداني سوداني. ابو وام سودانيين (اندي). فوق للاربعين مامشكله. حسن سير وسلوك برضو تمام. طيب المشكله في شنو؟ تعليم وكملناهو ومن اسره محافظه (ويتيم كمان). اكتر من كده نحننكم كيف؟ تعرفو اكتر حاجتين ممكن يقيفو في الطريق شنو؟ الحاجه الاولي يقولو ليك انو الاختيار في الاونه الاخيره بقي الزول (الف) بعرف الزول (باء) يقوم يرشح الزول (جيم) يختارو وزير. وانته تكون لا لامي في لام الالف لا في الياء. الحاجه التانيه يقولو ليك الاختيار بقي من القرايب عديل كده. والقرايب دي كمان ما للوزاره بس, دي حتي لو نفسك في وظيفه عليا, برضو قرايب بس. مش مدير سودانير عينو قريبو؟ ولا في زول كمان داير يقنعنا انو الزول دا اختارو للوظيفه دي عشان كفاءتو. والله الكفاءه ماعارفنها انتو ساي. يبقي الموضوع (قرايب بس). سيبكم من دي ونجي للوزاره. مش في وزير عندو حزب صغيروني كده من الاحزاب الصديقه للمؤتمر الوطني ادوهو عدد محدود من الوزارات الاتحاديه والولائيه, قام ادي اخو الصغير واحده منهم؟ وزيرين اخوان في الحكومه؟ بلاي مش مبالغه. الراجل لارجف ولا خجل  بس قال لي اخو تعال هاك الوزاره دي. متشوفنا نحنا يابتاع لندن انته. هسع معقول تكون في مناسبه في بيت العائله الكبير تتلما عربات وزارتك مع عربات وزارة اخوك في بيت واحد دي مش ازمه باركنق للجيران ساي؟ طيب مادام كدا ليه نحنا من اساسو بنفتكر الوزارات دي صعبه؟ خلونا نكب خيال ونشوف نبقي وزرا كيف. وعشان الحته دي انا نفسي ابقي وزير. تعرف عزيزي القارئ انو في وزرا بقو بي طريقه الذه من طريقة الاخونه دي؟

تصدقو مره في حكومتنا دي اختارو وزيره بالغلط وقالو انو الزول الاختارا كان بقصد اسم تاني  مشابه لي اسما. والوزيره ياخال دخلت في الدور زي (بيتر اوتول في فلم بكيت) لاقالت ياجماعه الحكايه شنو ولا حتي اندهشت.  طوالي لبدت وبقت كمان تعمل لقاءات صحفيه وبرامج في التلفزيون. كل زول من الجماعه كان بشوفا بفتكر رشحا زول تاني لغايه ما الزول العمل الحكايه كشف الموضوع ونضم طوالي لانو كان واصل. المحظوظه طبعا ماقدرو يغيروها, وقررو ينتظرو التعديل الوزاري الجاي. المهم الست الوزيره اتجدعت ليك في الوزاره بي مزاج كم شهر كدا, عربات وسفر وابهه لغايه ماجا التغير الجاي قامو شاتوها ليك. هسع وزاره بالطريقه دي مالا عيبوها لي. انشاء الله 3 شهور بس عشان نعمل كم سفريه للخليج نتجدع برضو علي اصحابنا الهناك واهو الاولاد يقولو ابونا الوزير وبعد داك يازول سجن سجن غرامه غرامه.  بلاي اتخيلو معاي الفارهه والسواق والمدام لابده تحت مكيف العربيه متقول بتحب الفشخره والبوبار, والاولاد مقتقتين في البيت من الاسبلت الكهربتو المجانيه والماخمج, والسواق تاني يوم علي المدارس القرانيه الخاصه.  والحاله الماهيه. لااابده في الحساب مابتنهبش خالص. والشغل اجتماعات بس وقبض واكل من امواج ساي. وحكايه السندوتشات بتاعة سلطه الدكوه والفول والطعميه الطالعه منها ريحه ورق الجرايد الهارننا بيها كل صباح ديك تكون راحت في الباي باي.

المهم ياناس الحوار الوطني اعرفو نحنا بنمثل شريحه الطبقه الوسطي الذابت بس ماماتت فطيسه. اعتبرونا منظمات مجتمع مدني, جمعيه صلاة الصبح او لجنه استقبال شهر رمضان.  وانا لازم تبقوني وزير لازم تبقوني وزير!! ولو ما انا ممكن تبقو محمد بتاع هولنده ولا ياسر بتاع الشارقه اوعثمان الفي الرياض ولا علي الفي لندن اومحمود بتاع نيويوك ولاالدكتور داك الفي استراليا ولا اي واحد هنا في الخرطوم مافارقه معانا, بس لو بقيت انا تبقي باسطه عديل كده.

Follow me in twitter@elrazi_elrazi

امنية سوداني عجوز

احد اصدقائي تخرج في جامعة الخرطوم قبل ظهور غول مايو بقليل ثم نال درجتي الماجستير والدكتوراة من

 بريطانيا مع منتصف سبعينيات القرن الماضي. عمل في شركة خاصة اجنبية الي ان نزل الي المعاش مكرما ويعيش الان في منزله بلاهم سوي سلطة الاسلام السياسي. عندما التقينا السنه الماضيه وقد كان حريصا علي لقائي سالته عما يجري للسودان. قال لي بكل حرقه انه وبعد هذا العمر الطويل ليس لديه غير امنية واحدة هي ان يصبح مليونيرا. فقلت له وماذا تريد ان تفعل بالمال وانته في خواتيم حياتك. قال لي اريد ان اجهز جيشا قويا اشتري له الطائرات من امريكا والدبابات من روسيا واخر ماتوصلت اليه التكنلوجيا اليابانية لاقوم باصطياد هؤلاء الاوغاد فردا فردا حتي لو دخلو في بطون امهاتهم.

نصر الدين المهدي... والأسرار

د الرازي الطيب ابوقناية

الجلسة التي جمعتني بالسيد نصر الدين المهدي في حضرة الاخ الحبيب عادل شرفي سفيرنا السابق في يوغندة لم تكن في الحسبان لانه لا توجد سابق معرفه لي بالرجل. حتي عندما كتبت عنه في احد مقالاتي السابقة (المهدي فيرسس المهدي) كنت اتحدث فقط عن مواقفه والتي قد رايتها في حينها مواقف وطنية سابقة لعصرها بكثير وكان دليلي علي ذلك ان حزبه تتبع خطواته وطابقها مطابقة الحافر علي الحافر ولكن بعد حين. اما ان تكون قد جمعتنا جلسة نتحاور فيها, فاشهد التاريخ انها لم تحصل من قبل.  ولذلك انا انظر الي الرجل بعين مجردة لن تضل طريق الحقيقة.

في مقالي ذلك كتبت مستغربا من تصرف حزب الامة حيال السيد نصر الدين من ناحية ومندهشا من ناحية اخري. كنت مستغربا لان الاتفاق مع الجبهة الثورية والزوبان فيها كان وسيظل شئ يفتخر به كل كيان سياسي يسعي لاسقاط الحكومة لانها الجهة الوحيدة التي لم تهادن النظام رغم كل الاغراءات التي قدمت لها.  وقد كان بمقدور حزب الامة القومي ان يتعامل مع إتفاق السيد نصر الدين معها كورقة رابحة في يده خصوصا وان المباحثات واللقاءات الثنائية بينه وبين الحكومة كانت في اوجها. اما استغرابي فقد كان سببه ان الحزب وبعد اتفاقه مع الجبهة الثورية في باريس اعتبر ان ذلك الاتفاق من اكبر الانتصارات التي حققها في تاريخه ولذلك نري السيد الامام يجوب شرق الارض وغربها من اجل تسويقه فكيف عابه علي الرجل؟

عندما بدأ الحوار بيننا كان اهتمامي منصب بشكل خاص في معرفة ما بداخل شخصية الرجل وكيف يفكر. وحقيقة لقد بهرني بافقه الواسع وشخصيته اللطيفة وفهمه العميق للمشكله السودانيه من زوايا لم اسمع احد من المعارضين يتطرق اليها من قبل. يقول الرجل ان المشكلة الحالية ليست في انقسامات حزب الامة او خلافه مع السيد الامام كما يعتقد الكثيرين. فحسب قوله ان الاختلاف بينهما مهما بلغ مداه فسيظل الامام اخ كريم يكن له كل الاحترام والتقدير. ولكن المشكله (في وجهة نظره) هي مشكلة السودان الكلية ووقوعة في براثن الاسلام السياسي وكيف يستطيع الفكاك منه.

بالرغم من المحطات الكثيرة التي وقفنا عندها الا ان هنالك محطة رئيسة كانت تعنيني بشكل مباشر واحسب انها تعني كثير من القراء الكرام ولذلك سالته منها بصورة مباشرة وهي مشاركة السيد عبد الرحمن الصادق في هذه الحكومة وهل تمت بموافقة والده والحزب ام كان قرار شخصي كما سوقت له بعض الجهات.

 نظر مليا في الهواء الفسيح فوقه وقال لي ان السيد عبد الرحمن وبمشاركته تلك قد قام بذبح والده (بسكين ميته) حسب تعبيره. وان تلك المشاركة قد تركت جرحا عميقا في جسد الحزب لن يشفي منه في القريب العاجل. وان الاكثر ايلاما في هذه المشاركه, انها تمت بمباركة الإمام شخصيا. سألته بإصرار ان يوضح لي بكل شفافية عن كيفية معرفته لتلك المباركة خصوصا ان الامام ظل يقول في كل المناسبات ان ذلك شأن يخص عبد الرحمن نفسه وانه ليس عضوا في الحزب حتي تتم مساءلته. قال لي ضاحكا بان ذلك ليس صحيحا لان الامام هو من بارك مشاركة ابنه في السلطة. وعندما طلبت منه ان يفتح الستارة اكثر قال انه قام بزيارة استباقية الي القاهرة لمقابلة الامام عندما سمع بان عبد الرحمن سيشارك في السلطة. وعندما تقابلا طلب من الامام عدم السماح لعبد الرحمن بالمشاركة مع النظام لان كل التبريرات لن تستطيع ان تقنع الراي العام بان الحزب ليس طرفا في ذلك. وعندما قال له الامام ان ذلك القرار يخص عبد الرحمن فقط, ناشده الاتصال لحظتها تلفونيا بعبد الرحمن في الخرطوم ومطالبته بعدم المشاركة, واذا سمع بنفسه رغبة عبد الرحمن في المشاركة, سيقتنع لحظتها بان الامام قد وقف موقفا مناهضا لمشاركة ابنه وسيشهد علي ذلك عندما تنكسر الجرة ويتدفق اللبن وقد كانت احدي بنات لامام شاهدة علي ذلك. ورفض الامام.

اشهد الله بان حدسي كان يقول ان السيد نصر الدين صادقا في كل كلمة قالها, واشهد الله بانني عانيت كثيرا لاصدق ماقاله لايماني العميق الراسخ داخلي ان الامام فوق الشبهات.

للحديث بقية.

Follow me in twitter@elrazi_elrazi

Visit my blog at www.elrazionline.blogspot.co.uk

إطلاق سراح مريم ليس الحل

د الرازي الطيب ابو قناية

انا ليس من اولئك الناس الذين يفرحون للحركات الصبيانية التي يقوم بها جهاز الامن بين الفينة والاخري من إعتقال شخص او إطلاق سراح اخر.  كأنه يريد ان يذكرنا بانه موجود وأن الميزانية التي وضعت تحت تصرفه يستغلها استغلالا صحيحا. لن أفرح لأنني اعي تماما ماذا يخبئون خلف الستارة. وحتي في المستقبل,  لن افرح اذا قام هذا الجهاز الشيطاني بتحرير احد المعتقلين السياسين او فك الحظر عن احدي الجرائد المغلقة او التبرع نقدا بمبالغ طائلة لاحد الاندية الرياضية او قام برعاية احتفالاتها بمبالغ كان اولي بها اهلنا الطيبين المحتاجين.

فالقبض علي د مريم والسيد ابراهيم الشيخ ماهو الا حركات صبيانية لا تصدر الا من اشخاص مسكونون بالظلم ويحملون بين صدروهم قلوبا غليظة فارغة من الرحمة. فما معني مثلا ان تقوم باحتجاز شخص لاسابيع تحرمه خلالها من حريته وقراءته للقران لمجرد انه حضر اجتماعا او قال رايه في حدث سياسي, ثم تاتي لاحقا وبدون خجل وتطلق سراحه دون ان توضح لنا لماذا اعتقلته ولماذا حررته.  فبالرغم من اننا نقوم بالصرف البذخي علي هذا الجهازالا ان تصرفاته لا ترتقي الي مستوي المسئولية وفيها كثير من الإجحاف في حق شعبنا. السؤال المحير من الذي يقوم باتخاذ قرار احتجاز شخص وماهي مبرراته للاحتجاز ولماذا يطلق سراحه بدون محاكمات؟

الاخبار الواردة امس الاول عن رئيس القضاء فيما يختص برئيس حزب المؤتمر السوداني  والمتعلقه بمناشدته للحزب للجلوس مع جهاز الامن للاتفاق علي صيغة يطلق بموجبها سراح رئيسة جعلتنا نشك في عدالة قضائنا ايضا. فليس هنالك دولة تحترم نفسها يمكن ان يصدر من رئيس قضائها مثل تلك المناشدة.  هل وصل بنا الحال الي درجة ان هذا الجهاز صار لا يعترف ايضا بقدسية القضاء وصار رئيس القضاء نفسه يضع له الف حساب؟ اذا وصل بنا الحال الي هذه الدرجة,  فعلي السودان السلام لان الكيزان بذلك يكونوا قد اجهزوا علي اخر معقل للاحترام لدينا.

سوف لن نحتفل بإطلاق سراح المنصورة فالسيد ابراهيم الشيخ وغيره لا يزالون في السجون. ولن نحتفل ايضا اذا اطلق سراحهم غدا او بعد غد او جاء الرئيس بجلالة قدره واعلن عن اطلاق جميع السجناء السياسين ليقيننا التام بان نفس الجهاز وباسرع مانتصور وباوامر مباشره من الرئيس نفسه سيقبض علي اخرين دون اسباب وسيقوم باطلاق سراحهم بدون اسباب ايضا. فنحن ياسادتي نعيش في عهد كيزاني لعين يحكمنا فيه اناس يدوسون علي كرامتنا وسماحة اسلامنا دون ان يرمش لهم جفن من اجل حماية مصالحهم المادية.  وسنواصل رفع الاكف الي العلي القدير طالبين منه ان يرينا يوما ليس فيه فقط وجوه مسودة كما حصل للنائب الاول السابق, ولكننا نريد ان نري فيهم جميعا مافعله سبحانه وتعالي بفرعون حتي يكونوا عظة لكل من تسول له نفسه بإستغلال ديننا الحنيف في المستقبل فهم فرعون زماننا. نحن ومنذ الان علي استعداد لتقبل الاخبار المستقبلية عن اعتقالات ستأتي شئنا ام ابينا. فالحل الوحيد كما نراه يكمن في طبيعة الطريق الذي سنسلكه. هل سيظل طريق السكوت علي افعال شياطين الانس ام طريق شهداء سبتمبر والذي سيقودنا لا محالة الي رمي هؤلاء الحثالة في مذبلة التاريخ؟  

Follow me in twitter@elrazi_elrazi

Visit my blog in: www.elrazionline.blogspot.co.uk

انصاف مدني والمقلب