شوف يازول اقول ليك شئ واحد بس. اصلا الموضوع لا يمكن يطلع من حاجتين. ولا الكيزان ديل كلهم بدون فرز وبما فيهم الناس الانضموا ليهم وحاولوا يوهمونا بانهم والله حركة اسلامية مما كانوا في الروضة او لمن حبوباتهم كانوا بشربوا القهوه سوا (سايكك) عديل كده, او يكون الناس ديل عندهم خلل كبير في مركز اتخاذ القرار حقهم. لانو صراحه عمايلهم بقت محيره بصوره شاذه. سيبك ياخ من حكاية نحنا عشان ننشر الاسلام محتاجين للسلطة والثروة دي, دا موضوع طلع ماسورة كبيرة. ديل السلطة والثروة بالنسبه ليهم غاية جاريين وراها عشان مكاسب دنيوية عندها علاقة بالنساء والمباني الفاخرة وتكديس الاموال والمصيبة كمان طلعوا من نوعية الناس البالعين بشاكير وما بشبعوا.
بعدين ياخ انا بعرف زول يتزنق في موضوع يشوف ليه مخارجة, بس جماعتك ديل بقت مخارجتهم اخير منها الزنقة زاته. كيف تبرر لي مخارجة غندور الاخيرة في المؤتمر الصحفي العملوا قبل كم يوم كده لمن اتزنق مرتين في حكاية الوثيقة الامنية العسكرية المسربة وحكاية التموين الحكومي المتوقع لي حزبهم في الانتخابات الجايه. سوري والله يامستر (غردون) دا كلام فطير وماممكن يمشي علينا لانو ماعندنا قنابير.
معقول تقول لينا لو حرب المستندات بدات ما بتقيف, وانتو عندكم المقدرة تطلعوا مستندات برضو؟ داسنها ليه طيب لي هسع؟ اول شئ كلامك دا بوري بما لا يدع مجال للشك انو الطلع دا (تسريب) لانو التسريب معناه حاجة موجودة في مكان سري قامت طلعت للعلن بواسطة ناس من جوه (الجك). ودي طبعا عكس حكاية حاجة ماموجوده وقامت طلعت لانو دي اسمها (فبركة). يعني بالواضح كدا انته جيت تكحلة عميته. الحكايه دي بتجيب كلام تاني. هل الوثيقه اتسربت وعندكم في جماعتكم ناس بسربوا الوثائق بغض النظر اذا كانو متوافقين مع الاغلبيه ولا لا؟ الناس ديل اكيد كيزان زيكم لانو طبعا اي زول مدور حولكم كوز او منتفع. طيب كيف ناس من ناسكم بغض النظر اذا كانوا ضد فلان او علان تصل بيهم الجراه لي تسريب وثيقة خطيرة زي دي ممكن عواقبها تكون خطيره علي المستوي الداخلي والاقليمي والعالمي علي (تنظيمكم الاسلامي) . وهل (القلوب) المتجهة الي الله سبحانه وتعالي اصبحت قلوب خائنه ووصلت مرحلة عدم الاكتراث لي وجودية التنظيم نفسه؟
الموضوع التاني حكاية التموين المتوقع لي حزبكم من الحكومة لتغطية منصرفات مؤتمركم العام وانتخابات السنه الجايه. صراحة تبريرك بتاع خزائنكم مليانه لي درجه انكم حاتاجروا عربات من القصر عشان الشخصيات المهمه الحا يستضيفا المؤتمر اخير منوا تموين الحكومة. معقول ياسي (غردون) قلبتوا القصر لي مكتب لتأجير السيارات. والسيارات ياتا؟ السيادية. مش القصر هو المكتب السيادي للدوله ولا خلاص مليتو بي الخموم بتاعنكم وبقت مافارقه تاجروا عربات ولا تقيموا حفلات ولا تعملوا اي حاجه لانو البلد بلدكم وانتوا اسيادا. ودي يفهموها كيف ياحضرة المستعمر لانو غردون سيد الاسم ماعملا. هل في مكتب خاص لايجار السيارات في القصر؟ ولو في تابع لي منو؟ بكري ولا حسبو ولا لي واحد من المساعدين القاعدين منظر ديلك؟ عشان كده ونحنا لي زمن محتارين الناس الكتار القاعدين في القصر ديل بعملوا في شنو وهم اتاريهم باجروا العربات. بعدين الايجار دا حصري علي المؤتمر الوطني ولا اي حزب اخر او جماعه او حتي عريس او طلبة حفلات التخريج ممكن ياجروا منه؟ مش كلنا سودانيين وبنتمتع بي كل الحقوق الدستورية من حرية التعبير وحق التنقل (وايجار السيارات)؟ والقروش بتاعة الايجار دي بتمشي خزينة الدولة ولا برضو مصيرها التجنيب؟
غاتيو شوف ياعمك نحنا خلاص طفح الكيل ووصلنا لي نتيجة واحدة مافي غيرا وهي انكم ناس زباله ومافي مجال اصلا لاصلاحكم. وزي ماقال واحد معارض كبير قبل كده الحل الوحيد هو (اقتلاعكم من جزوركم). المعارضة الرسمية المنظمة وافقت واقفت ماوافقت نحنا القوي المستنيرة حانمشي في الشارع دا لي نهايتو ورافعين شعار واحد مافي غيرو (لا حوار مع القتله) ولتذهب المعارضة وامبيكي والامم المتحدة الي الجحيم.
Follow me in twitter@elrazi_elrazi
