الكلام القاله وزير الاعلام بخصوص رفع يد جهاز الامن من الرقابة علي الصحف كلام فارغ لا معني له وزيه وزي اي كلام قالته الحكومه دي بخصوص المعتقلات والحوار . انا غايتو اصلا ماشفته حكومة مسكونة بالكذب زي حكومتنا دي وكمان دايره تلعب بي عقولنا. في موضوع اطلاق سراح د مريم قلنا اصلا دي ما بنعتبرها حسنة من الحكومه لانو بكره ممكن تقبض الف مريم وفعلا بعد طلوع المجموعه الكانت معتقلة من السياسيين قام جهاز الامن في الايام الفاتت باعتقال كل المناضلين خوفا من تحريك الشارع بمناسبه سبتمبر وفيهم شيوعيين وبعثيين ومؤتمر سوداني.
عشان كده مايجي الوزير دا يقول لينا فكينا ولا رفعنا. الحكومه دي ممكن تفك وتقبض وممكن ترفع وتنزل لانها عايشه علي الكذب دا من اول يوم انقلبت فيه علي الشرعية.
الحل الوحيد في الثورة الشعبية واقتلاع النظام دا من جذوره. نحنا مادايرين اي كوز يكون حتي حايم في دائره حكوميه ولائيه كانت او اتحاديه لانو الناس ديل اثبتو لينا انهم اعداءنا الحقيقيين ولا مجال لوجودهم بيننا.
ليست هناك تعليقات:
إرسال تعليق