نحنا ضد إنتخابات هدفها الاساسي شرعنة حكم الكيزان. الفلم دا دخلناه في 2010 ومستحيل تمر علينا نفس الخدعة مرة تانية
لانه لا يلدغ الانسان من جحر مرتين. طبعا بعد شوية الغواصات واحزاب الفكة والناس المنتعة من حكم الكيزان وبايعاذ من جهاز الامن حيطلعوا لينا بي شعارات زي مرشح واحد ضد المؤتمر الوطني, ودارين نشوف جدية الحكومه والدستور بقول شنو ماعارف. دي كلها ارهاصات مدفوعة الاجر للجماعة ديل عشان بس يستمر الكيزان في سحق الشعب واكل اموالنا بالباطل وباسم الدين.
في الانتخابات الفاتت كانت في مسرحيات سخيفة بتاعة مشاركة وانسحاب ثم مشاركة ثم انسحاب لغاية ما إنتهي الامر بي حزب كبير زي الاتحادي شارك ومرشحه جاب عدد من اصوات نخجل نقولا هنا لانها بتتعارض مع تاريخه الطويل.
المره دي لازم الناس تقيف كلها وقفة واحدة. مادايرين انتخابات يعني مادايرنها. واي حزب يشارك او حتي يقول كلام في مصلحة العملية الانتخابية نعتبره مهادن ونشطبه من لستة المعارضة مهما كان الحزب دا حتي لو بقي الاتحادي ذات نفسه.
مرة واحدة يامعارضه اقيفوا موقف ثابت وبطلوا اللهث وراء اموال المؤتمر الوطني لانها اموال حرام ومنهوبه من حق المساكين. دا دور حزب الامة القومي والجبهة الثورية ومطاوب منهم يقيفوا موقف موحد وجامد مهما حصل لمنع قيام مثل هذه المهزلة عشان كمان دي تكون البداية الحقيقية الانتظرناها طويلا لهدم هذا النظام الفاشي المستبد.
ليست هناك تعليقات:
إرسال تعليق