صحي جمال الوالي مشتت؟

والله الكيزان حيرونا عديل كده. حتي انته ياجمال؟ ياخ الناقصك شنو والبلد قصرت في حقك في شنو؟ اي حاجه دايرا عملتها ليك. قناه فضائيه, مصانع, شركات ترحيل, بنك وماخفي كان اعظم.
ومال نحنا نعمل شنو؟ تعرف اي سوداني بدون فرز لو لقي ذرة من العندك مابطلع يسيب البلد دي. وحتي لو كان بره السودان برجع.  انا بعرف مجموعه كبيره جدا من مغتربين عندهم مؤهلات عالية وخبرة تسد السما دا, لو الواحد فيهم لقي ليو رقشه رقشتين يطلعو ليو حق الملاح بطريقة مستقرة, يرجع السودان الليلة قبل بكره.

اوكي مامشكلة بس دايرين نعرف الزعلك شنو والقرار دا وصلته ليو كيف والجماعه رايهم شنو؟ بعدين مش انته مؤتمر وطني والناس بتقول كل القروش حقتهم وانته مستثمرا ساي ليهم؟ طيب اها البحصل شنو في الشتات دا. حتشيل القروش معاك ولا حتسلما. ولا خلاص بقت حقتك تتصرف فيها زي ماداير. طبعا انا اصلا مابقدر اقتنع انو القروش دي حقتك وفي ظروف زي النحنا فيها دي. اقول ليك سر؟ نحنا وبي امكانياتنا الاكاديمية وخبراتنا الكبيره دي ماقادرين نلم النصاب بتاع الذكاة لي هسع, وماذكينا امكن لينا زمن لانو بنفطها كل سنه. معقول ياقريبي مانذكي ودينا يكون ناقص؟ وبيني وبينك لو ماساي قربنا نشيل من قروش الذكاة البرسلوها لينا اولادنا واخوانا عشان نقسما لي مساكين الاهل. واهو في النهاية الاقربون اولي بالاحسان.

يلا نجي لي موضوع الاولاد. قرينا في الاخبار سايقهم معاك وانك حتسجلهم في مدارس انجليزية. انته عارف بريطانيا دي مافيها مدارس بتدرس دين وعربي الا توديهم في الخاص؟ نحنا بنعرفا كويس وعشنا فيها وعارفين خباياها. وبالمناسبه مدراسا ذاتا مافيها حجاب ولا انته الحكايه دي ماهاماك. فالمجتمع هناك ببلع اي زول عمرو بين 5 و16 سنه, والبيئة قويه جدا. الموضوع دا فاطيو ساي يعني؟ نحنا عارفين في السودان كان هاميك. قوانين المؤتمر الوطني كانت بتمنع سبيبه من شعر اي بت تمد راسا تحت الطرحه. والبتعمل كدا الله قال بي قولا. مكنة كبيرة كانت بتهرس في بناتنا وانته كنته ترس في المكنه دي. معقول تجي تودي الاولاد بريطانيا العظمي لي اعداء الاسلام؟

اها والفكه شايلا معاك ولا حاتسيبها في البنوك هنا تشغلا ليك. والله لو شلتها معاك تكون بالغته. حتبيع يعني الحاجات العندك وتحول القروش؟ بس مافي تاجر عمله حيكون عندو مبالغ زي دي. ياخ والله نحنا لا مؤتمر وطني ولا حاجه وممكن تاتمنا عليها مليم مايطلع بره الشبكه بس ماجربتونا ساي. ولا ماهاماك الحكاية دي ومفتكر زي مبقولو اهلك الانجليز (ايزي كم ايزي قو). اوع يكون مفتكر في بريطانيا ممكن برضو تعمل بنوك وقنوات فضائية وكده. اعمل حسابك يازول والله هناك السستم رقيب عتيد مش زي الغربال العندنا هنا دا. وفي عرب شوام ومصريين والله ممكن يسرقو الكحل من العين.

تعرف يابو الجيم, انا اصلو مابنصحك تشتت لانو انته في السودان (كنق) عديل كده. السكر بالشوال واللحم بالكيلو وعربيتك مليانه بنزين. وكمان ممكن تشغل اي زول محتاج ودي حسنات ياخ ماتستعجل وتضيعا ساي. بعدين انته قايل حكاية المريخ دي ساهله؟ ياخ علي الاقل بتخش الكورة مجاني وممكن تتكلم مع هيثم مصطفي وبله جابر واتوفستر في اي وكت وتتصور معاهم كمان.

وانته كمان محبوب في الساحه لانو شكلك ماعبيط زي الناس التانيين ونحنا مامغيوظين منك شديد الا لمن الواحد يكون بتكلم (بولوتيكا). ماشفته الناس البجو بدونا في التنك ديلك؟ والله مره انا قاعد قدام التلفويون واحد من ناسكم ديل عمل لي طمام. بتكلم في قناة الجزيرة وصاري وشو لي شنو ماعارف. قلته للمره انتي الزول دا بعاين لي شديد كده قاصدني ولا شنو؟ وتاخ قفلنا ليك التلفزيون في وشو وقلته ليها قومي بلاي بلا 1800 دولار بلا نحس معاك.

المهم نحنا مافي الدايره حقتك عشان نقول ليك ماتشتت, بس ماتشتت ياخ. معقول المليونير الوحيد  العندنا نفقدو. طيب قدام دول عدم الانحياز نقول مليونيرنا منو؟ لكن لو ركبته راسك, بلاي ماتنسانا من صالح الدعوات. واطلب من ربنا الحلاك يحلنا نحنا كمان. فقد ضاق الحال وبلغت الروح الحلقوم.

Follow me in twitter@elrazi_elrazi